吳朋奉陳竹昇邀大家「台步」行起來！在誠品講台語就是爽【影】

（芋傳媒記者簡翊展報導）由中央社採集、印刻文學出版的《做伙走台步：疼入心肝的 24 堂台語課》，28 日在松菸誠品舉辦新書發表，邀請三位書中的主角：台語老師許沛琳、兩位影帝吳朋奉和陳竹昇，分享台語和他們生命的點點滴滴，有傳言「台語」可能在二十年內消失，吳朋奉堅定地表示，台語就像咸豐草一樣充滿生命力，過去國語政策都無法完全根絕，只要大家勇於開口講台語，台語絕對不會消失！

佇誠品書店講台語ê感想：爽！

為《做伙走台步：疼入心肝的 24 堂台語課》寫序 ê 「鳥人」劉克襄表示，會使佇誠品書店內底用台語演講，心內感受只有一字：「爽」。他解釋，過去威權時期逐（ta̍k）家感覺「國語」較高尚，真濟（tsē）人攏無願意講台語，尾仔解嚴了後，1990 年代伍佰衝（tshìng）起來，代表著台語文化 ê 發展，所以今仔日會使佇遮講台語，不只是爽，閣有背後 ê 意義！

• ê：的
• 逐（ta̍k）：每、每個
• 濟（tsē）：多
• 衝（tshìng），形容人的氣勢豪盛

國校台語老師許沛琳表示，佇學校囝仔攏叫伊「阿沛（phài）老師」，佇學校囝仔佮（kah）伊相借問攏是用台語，伊自 2011 年開始做台語代課老師，自一、二年仔教「一二三四」到高年仔教「台灣文化」，其實伊真無成就感。

• 佮（kah）：和、與、一起

佇學校教冊無成就感 ê 原因，許沛琳解釋，因為逐禮拜著干焦（kan-na）一節課，所以囝仔 ê 台語無啥進步，真濟囝仔普通時仔攏無機會講台語，一禮拜著一節課，所以伊逐節台語課攏會盡最大 ê 力量，希望囝仔會使佮意（kah-ì）台語、將台語囥（khǹg）佇心內。

• 干焦（kanna）：只有
• 佮意（kah-ì）：喜歡
• 囥（khǹg）：放置、存放

演員陳竹昇認為影響伊較愛講台語 ê 原因應該是環境，陳竹昇講，伊是 1975 年生 ê，1985 年真濟台語創作出現，彼當陣伊大概是十歲，所以看著啥著學啥，而且伊佇新莊街大漢，比較較無遐爾（hiah-nī）「國語」，大漢了後到台北市加入劇團，才發現講台語 ê 人其實是少數。

• 遐爾（hiah-nī）：那麼

台語對於陳竹昇來講是日常生活 ê 一部分，陳竹昇表示，真正提台語文課本予伊讀，伊無啥會曉讀，但是生活當中，一寡有營養、無營養 ê 應該有夠用矣！

「三金影帝」吳朋奉講，伊佇日本拜訪過一个（ê）現代劇大師鈴木，對方要求伊唱歌，伊唱一首台語佮一首「國語」，尾仔鈴木攏愛伊唱台語，因為鈴木大師感覺著，伊佮台語 ê 感情較親近。

• 个（ê）：個

吳朋奉ê反骨行台語路 陳竹昇自操姦撬（kàn-kiāu）開始學台語

過去吳朋奉會創作台語詩，吳朋奉表示，寫台語詩是因為伊反骨，因為伊私下攏講台語，哪會使寫物件攏用華語，所以著想講開始用台語來寫詩、用台語來思考代誌。他也表示，作為一个表演者，反骨是非常重要 ê！

陳竹昇對台語是位垃圾話開始學起，劉克襄問許沛琳，「佇咧作老師 ê 時陣，敢捌聽過囝仔撬（kiāu）歹聽話」，許沛琳應講，若是囝仔會用台語撬，伊顛倒會感覺真歡喜，因為囝仔攏無啥會曉講台語，攏是用「國語」佇咧撬。

• 撬（kiāu）：指「以工具作為槓桿以增加力道，而把鎖住或卡住的門、鎖撬開，或把石頭等重物舉起。」帶有性暗示，今大家多習慣「姦撬（kàn-kiāu）」來指罵髒話

 

「細漢 ê 時陣用台語操姦撬（tshò-kàn-kiāu）是一件足爽快 ê 代誌，撬落到底著會使感覺著『這个語言是我 ê』，焉爾講才會爽，這世人著佮這个語言鬥陣矣。」吳朋奉笑笑仔講。

• 操姦撬（tshò-kàn-kiāu）：罵髒話，「姦」和「撬」都有性的意思

對於「操姦撬」陳竹昇嘛有一套家己 ê 看法，伊認為彼是一種感情 ê 展現，親像是好朋友之間，講話、拍招呼加減會加入一字「kán」親像是：「kán，汝食飽袂？」陳竹昇講，學習一款語言愛位「撬」開始，透過「撬」去學彼个氣口佮感情。

台語有土地ê氣味 爸母愛盡量佮囝仔講台語

有傳言台灣囝仔、青少年 ê 母語能力普遍不彰，陳竹昇認為，這个現象佮環境有關係，都市以外平常時仔講台語 ê 比例較懸（kuân），佇無捷運 ê 所在，應該十个囝仔抾（khioh）有七八个。吳朋奉表示，會使佇厝內佮囝仔講台語著愛盡量講，若無到學校，同學攏袂曉講，一禮拜一節課四十分鐘實在是無夠。

• 懸（kuân）：高、高度
• 抾（khioh）：撿拾、拿、收集

面對囝仔母語能力不佳 ê 問題，許沛琳表示，咱著是盡量教，伊嘛會要求囝仔返去厝 ê 愛讀課文、唱台語歌予爸母聽，嘛因為台灣各地腔口無仝（kâng），課本內底嘛有教方言差。

• 仝（kâng）：相同、沒有差異

劉克襄請教陳竹昇「焉怎教孩子講台語」，陳竹昇應，愛用一寡步數唌（siânn）囝仔開喙（tshuì），嘛毋免予囝仔壓力，講毋著嘛無要緊，先較輕鬆 ê，推廣 ê 效果才會好，學唱台語歌嘛是一款真好 ê 方式，台語字念了若好，聲才會足、唱起來才會好聽。

• 唌（siânn）：引誘
• 喙（tshuì）：嘴

吳朋奉講，爸母愛有意識，佇厝 ê 著愛講台語，莫（mài）因為感覺麻煩著佮囝仔改講華語，伊頭仔是位布袋戲開始學台語，尾仔若無看布袋戲，伊真正會死！

• 莫（mài）：不要

吳朋奉嘛佮逐家講，較早佇學校讀冊讀《孔孟》害伊討厭「國語」，「國語」佮伊距離足遠無法度親近，有法度親近 ê 只有台語，「國語」只是伊 ê 第二語言。他強調，講台語佮土地、人民才有一種結合。陳竹昇嘛同意吳朋奉 ê 看法，伊認為，用母語拍招呼、開講嘛較有感情！

最近幾冬（tang）台灣 ê 演員會曉講台語 ê 比例有提升，吳朋奉認為，是因為愈來愈濟劇本是寫在地 ê 故事，台語是拍台灣戲劇非常基本 ê 語言，所謂「台語」應該包括客話佮原住民族語、甚至是華語，台語對真濟人來講，攏是心肝內 ê 上愛、上有感情 ê 語言。陳竹昇表示，台語創作 ê 重點著是土地 ê 氣味佮原底民眾講話 ê 氣口，伊是足期待後壁 ê 發展，因為逐家想法愈來愈濟，發展當然著愈來愈濟、愈來愈好。

• 冬（tang）：年

「浪子回頭衝甲擋未牢」台語歌創作不斷，台語著救會返來！

進前吳朋奉佇《浪子回頭》MV 內底演男主角，MV 佇 YouTube 已經有超過八千四百五十萬次 ê 瀏覽量，吳朋奉講，替《浪子回頭》拍 MV 是伊上歡喜 ê 代誌，毋是因為彼「八千萬」，是因為這條台語歌，予逐家佮意台語，甚至紅甲連中國沿海 ê 人攏愛唱，真濟人袂曉講台語，但是願意將這條歌自頭至尾學起來，音樂 ê 影響真正是上強 ê！

陳竹昇表示，有 ê 創作者有一寡靈感佮物件應該著愛先寫起來，總有一工用會著，像《父後七日》內底，吳朋奉彼句出名 ê 台詞「我姦天、姦地、姦命運、姦社會，汝抑毋是阮老爸汝甲我管遐濟！」著是吳朋奉較早家己記錄起來 ê 靈感！

有傳言講「台語會佇 20 年內消逝去」，劉克襄請教逐家 ê 看法，許沛琳講，真濟人講台語是「住加護病房 ê 語言」，但我是伊相信，這馬醫學這發達，逐家作伙來拍拚，一定救會返來，咱毋通悲觀，台語有希望，靠逐家作伙加油！

陳竹昇表示，伊個人嘛無這悲觀，因為一定有人會直直講，一直有人繼續用台語做作品，台語嘛是一寡人平常時仔使用 ê 語言，用台語做創作是上好 ê 傳承方式，台語才會使活了久長，用台語創作嘛真趣味。

「台語著像咸豐草，掖（iā）掖落著通好生規片，著算用農藥落去毒（thāu），只要幾欉無死，著通好閣生規片！」吳朋奉講，伊嘛袂悲觀，細漢時佇學校講台語閣愛罰錢、罰寫「我不說台語」，彼時受著這款壓迫，台語嘛無曲（khiau）去。想著過去台語受著 ê 壓迫，吳朋奉嘛嘆一聲：「當年人是用強勢來壓迫啊！唉……這馬講彼嘛無效矣……」

• 掖（iā）：撒
• 曲（khiau）：彎曲，也可代指死亡

發表會上尾仔，陳竹昇帶領現場講者佮讀者作伙合唱三首台語歌，《舞女》、《愛拚才會贏》佮《孤女 ê 願望》，吳朋奉笑講，「伊其實是想欲做歌手，稍等逐家欲做伙來去唱 KTV 無？」

《做伙走台步：疼入心肝的 24 堂台語課》以「台語傳承」為主題 ê 24 篇專訪，著親像是 24 堂趣味心適 ê 台語課，由上頂真 ê 講師授課，師資包括吳念真、林強、蔡振南、陳竹昇、澎恰恰、吳朋奉、陳豐惠、王金櫻、滅火器樂團佮董事長樂團。

[taronews-styles book_title=”做伙走台步：疼入心肝的24堂台語課” book_author=”中央社「文化+」採訪團隊” book_publisher=”印刻文學” book_publish_date=”2019/10/19″ book_cover=”https://cdn.taronews.tw/files/2019/10/getImage-5db7bc5326b84.jpeg” book_link=”https://www.books.com.tw/exep/assp.php/taronews/products/0010836712?utm_source=taronews&utm_medium=ap-books&utm_content=recommend&utm_campaign=ap-201910″ book_link_text=”博客來購書” style=”book”][/taronews-styles]